承諾對於每一個人嘅重量都唔一樣。有啲人慣性下巴輕輕，會為咗得到自己想要嘅嘢而亂咁向人作出...

承諾對於每一個人嘅重量都唔一樣。有啲人慣性下巴輕輕，會為咗得到自己想要嘅嘢而亂咁向人作出承諾；有啲人理智行先言出必行，講得出就一定做得到。 我好重視承諾，但係自己又唔會太過去承諾人 - 因為我好怕自己最後都會失望 :(

我其實同好多人一樣，都係背負住好多嘅過去同傷痕。有時就算幾努力擺脫過去都好，見過鬼都仍然會怕黑。除非我感覺到好大嘅安全感，如果唔係對住我愛上嘅男人其實我好害怕承諾。當佢對我好對我溫柔嘅時候，我感到幸福嘅同時又會幻想到佢熱情冷卻之後我在啜泣嘅情景；當佢想向我承諾嘅時候，我會好感動嘅同時亦幻想到佢因為另一個人而我又要執嘢離開佢屋企嘅畫面。承諾對我來講係一件好重嘅事，應承咗就唔可以隨便放低。當然承諾亦係一種不求回報嘅付出，太過計較就唔會得到真正嘅愛情。我最怕嘅只係當一段感情結束之後回想返過去嘅承諾，嗰種感覺真係好痛苦。坦白講，對於嗰一種未來有期望同等待嘅承諾我真係有恐懼。承諾唔需要太遙遠，一個眼前當下嘅約定就可以。

當然承諾亦都有變質嘅時候。兩個人拍拖一齊成長攜手向前跑多數都唔會有問題，最怕係一個不斷進步另一個原地踏步，距離越嚟越遠失去共通語言導致感情破裂。呢一刻你要問自己究竟你係愛呢一個人，定話純粹愛呢一個承諾。

大部份嘅女人好需要承諾，因為承諾帶嚟安全感；有部分男人抗拒承諾 (我唔計想玩女人嗰啲啦)，因為男人責任心強，覺得如果最後履行唔到承諾會係一件好唔負責任嘅事。但係女人認為男人如果連一個承諾都唔願意佢行，但係同時又得到所有情人嘅 benefit 就會覺得好唔公平，會覺得男人對呢一段關係唔認真。承諾一直都係男人同女人嘅一場角力賽。我嘅建議係女人唔好嘗試去強迫去男人承諾。佢要嘅點都會去做，佢唔想迫佢都冇用，最 worse 嘅就係越迫越走，desperate is not attractive at all；男人亦要明白女人需要一個肯定需要一個名分需要安全感需要氹，但唔係呃。多數都係女人太急男人太過唔急。

如果你深愛着一個人，對我嚟講其實有無承諾根本就無分別。即使無承諾過嘅日子都會同有承諾嘅一樣。最重要嘅係搵到一個大家都識得珍惜對方同有呢一個共識嘅人。共勉之。

---